Muine Heume
Jui prohlt den Rhuin und suine Wuine, jui der weser greunen Strand, jo, jeuder Minske prohlt dat suine, eck lowe mui muin Lipperland. Wat ligt et dor seo wunnernett, os wor’t eun eunzig Bleomenbett, in’n Sunnenschuin, seo lecht un scheun, man kann sick garnich satt dran seuhn. Keun anner Land, dat kümmt ’n gluik, et es de Kreon in’n duitsken Ruik.
Suih mol de Soot, de greunen Wiesen, de duistre Waold in suiner Pracht, do stoht de Bäume slank os Riesen un lowet Gott un suine Macht. Wost diu suin Wesen recht verstohn, dann most diu frech no’en Holte gohn; wenn owwern Weg de Reihbock springt, de Draossel in’ne Buske singt, dann geuht düer’t Holt seo’n frommen Grius, os wor de Waold eun Goddeshius.
Bist diu mol up de Berge stiegen un häst den graoten Hermen seuhn? Do könnt de annern doch nich tiegen, de hat nich mol’n Externsteun. De Rhuin met suiner Lurelui, dat es de reune Flunkerui, de Jumfer met den güllen Hoor, dat Minske es jo gor noch doer! Un hunnert Stunne kannst diu gohn, seo’n Hermen suihst diu neuernt stohn!
Wennt Winder wird in iusen Lanne un Holsken gift anstatt der Scheoh, dann kümmt de Mann met widden Sanne un strojjet olle Wege teo. Wenn dann de Jungens Nüde knackt, de Modder leckern Pickert backt, un in ’er Stoben üm ’en Disk de Kinner sit’t seo fraoh un frisk, dann frog eck nicks no Broen un Wuin, dann möcht eck in ’er Heume suin.
Do sind de Minsken nao seo innig un nich seo dreuge os ’en Pinn, de Wuiweslui seo leuw un sinnig, do es’n warmes Herten in. Wenn dui eunmol seo’n wacker Luit recht nüipe in ’e Aogen suiht und dui met ehren soiten Mund anlacht seo recht van Hertensgrund, dann kannst diu reusen owert Meer, dat Kind vergettst diu nimmermehr.
Van oll den Woiern duitsker Tungen klang mui keun eunziget seo wert un keunt es mui int Herte drungen, os wat de Modder us hat lehrt. Drückt mui mol euner warm de Hand un deit seo fründlick, seo bekannt un sägt seo wacker „diu“ teo mui un froget glück: « Wo geuht et dui? » Dann werd et mui seo warm teo Sinn, dann weut eck, dat eck heume sin.
|